FESTE RELIGIOSE DI LAVATOGHJU

  • 17 DI GHJENNAGHJU : 
    Festa di Sant Antone Abbate patrone di a cunfraternita : Messa è prucissiò ind’è e strette di u paese è benedizioni di l’arranci.
    Sant’Antone mezu di ghjennaghju e pernice paghju à paghju !
    Sant’Antone un’urone !
  • 10 D’AOSTU
    Festa di san larenzu (San Larè) ind’è a villa di « a croce » Messa è prucissiò ind’è e strette di u paisolu. San Larè si festighjeghje u ghjornu stessu.
    San Larè gran’cadura, Sant’Antone gran’friddura !
  • A A FINE DI U MESE D’AOSTU
    Festa di a Madonna di a Cunsulazione : Messa è prucissiò ind’è e strette di u paese. Sta festa hè stata rinuvillata in u 2004 u ghjornu di a rinascita di a cunfraternita Sant Antone Abbate Archiconfraternitas Sanctæ Mariæ Suffragi, induve a Madonna di a Cunsulazione hè stata purtata in prucissiò, dipoi tutti l’anni si festighjeghje a madonna di a cunsulazione chi ghjè dinù a patrona di a ghjesgia, è in listessu tempu a rinascita di a cunfraternita.
  • 8 DI SITTEMBRE
    Messa è prucissio di a Madonna di a Stella. A cappella si trove in sarra di lavatoghju trà u monte Bracaghju è u capu d’Oggi. A Madonna di a Stella si festighjeghje u ghjornu stessu. Dopu a messa è a prucissiò a mane ; Lavatughjinchi è lumiacci si ritrovanu à l’ingiru d’una mirendella.
    Cullàtevine in bracaghju ci truvarete un castellu
    Supraneghje la sarra cù una piccula cappella
    Chì di l’ottu di sitembre hè la Madonna di a Stella .
  • 10 D’OTTOBRE
    Festa di San Cervone patrone di u paese. A cappella di San Cervone si trove in campu santu, chì puderebbe esse u locu d’orìgine di u paese. Oghje a stàtula San Cervone si trove in ghjesgia. Si face a messa, è a prucissiò intornu à u paese ; hè u Santu u più pisìvu di Lavatoghju.
    San Cervone un pignattu leve è l’astru pone.
  • A PASQUA
    A settimana santa hè urganisata da a cunfraternita. Si facenu i via crucis, l’uffiziu di e tenebre u marcuri, è a granitula per u vennari Santu. A vigilia di u sabbatu santu ; benedizione di u focu è di l’acqua, si face cù e cunfraternite di Aregnu Curabara è Muru, hè stata rimessa in opera da e quatru cunfraternite in u 2014, è ogni annu si face ind’è un paese sfarente.
  • NATALE
    S’ellu ùn ci hè messa di Natale a cunfraternita urganiseghje una veghja cù canti è prighere u 24 à sera à partesi da 7 ore ghjustu nanzu d’accende u fucone.

Liens utiles

Mairie de Lavatoggio

Village
20225

04 95 61 70 70

Envoyez-nous un E-mail